வாழ்க்கை... ஒரு பார்வை!

உலகமே உங்கள் கையில்! ஆனால் நீங்கள்...?

உலகை உங்கள் கையினில் இன்று
ஒரு கைபேசி தந்திடும் நன்று!

ஆனால்...
உள்மனம் மட்டும்  வசப்பட வில்லை
உள்ளும் புறமும் ஆயிரம் தொல்லை!
                            
வளர்ந்தது விஞ்ஞானம் குறுகியது உலகம்
வறண்டது மெய்ஞ்ஞானம் குறுகியது உள்ளகம்!

முள்ளும் மலரும் உறவின் முகங்கள்
முதிர்வும் நெகிழ்வும் உதவும் கரங்கள்!

உற்ற  நண்பர்கள்  உறவினும்  மேலோர்
உணர்ந்து தெளிந்தவர் உலகை வென்றோர்!


பணமெது? மனமெது? வீடெது? நாடெது?
பொய்யெது? மெய்யெது? சுகமெது? வரமெது?

அன்று, மனமெனும் தலைக்குப் பணம் வெறும் அடியாள்
இன்று, பணம் நாட்டாமை மனம் வெறும் ஆமை!


அன்று, நாட்டைத் தாங்கிப் பிடித்த வேர்  வீடு
இன்று, நாடுகள் அறைகள்...இது நாட்டார் வீடு!


என்னிடம் குறைகளா...!? பொய்! பொய்! இது பொய்!
மனிதர்கள் மோசம்...! இது மெய், இது மெய்!

அடுத்தவர் நம்மைப் புகழ்ந்தால் அது சுகம்,
படுத்த உடனே உறங்கினால் அது வரம்!

செல்வமும் சுகமும்  பயணச் சீட்டே
பயணமே  அதுவெனப் பார்த்தால்  வேட்டே!

வாழ்க்கை என்பது வாய்ப்பது அன்று
வலிந்து தெரிந்து  சுவைப்பது இன்று!

உடல் ஒரு கருவி, ஊடகம் தானே?
உள்ளம் சொல்லும்: எஜமான் நானே!

உடலை வளர்த்தோர் உயிர் வளர்த்தாரே, 
உள்ளே வளர்ந்தோர் உலகளந்தாரே!


மனமும் மதியுமே ஆக்கும் கருவிகள்
மானுட நேயம் வார்க்கும் அருவிகள்!

உயிருடன் இருப்பது மட்டுமே வாழ்க்கையா?
உவந்து  கலந்து  உயர்வது  நேர்த்தியா?

ஒவ்வொரு நாளும் உறங்கும் முன்பு
ஒரே  ஒரு  கேள்வி  உதயமாகட்டும்!

இன்று நாம் வாழ்ந்தோமா?
எப்போ? எப்படி? எவ்வளவு நேரம்?

- மனம் திறந்து...(மதி)

பின் குறிப்பு:

1. அவையடக்க அறிவிப்பு: நான் கவிஞன் அல்ல!
2. அவையடக்கம்:- கொதித்து எழுகின்ற அவையினரை அடக்க முயற்சி செய்வது!?